ილიას სახელმწიფო უნივერსიტეტის პროფესორი გია ნოდია ქართველებისა და აზერბაიჯანელებისთვის ნარიმან ნარიმანოვის მნიშვნელობაზე საუბრობს. პოლიტოლოგი ხსნის, თუ რატომ ხდება ნარიმან ნარიმანოვის ძეგლი დროგამოშვებით მწვავე დაპირისპირების საგანი და რა გამოწვევებს უქმნის ეთნიკურ უმცირესობებს მსგავსი საკითხებით მანიპულირება.

ივლისის მოვლენების დროს საერთო ქსენოფობიური სურათის გასაძლიერებლად, ტრადიციულად, ულტრამემარჯვენე Facebook-გვერდი “ალტ ინფოც” აქტიურობდა. მათ ნარიმან ნარიმანოვის ძეგლთან გამართულ აქციასა და ამერიკაში მიმდინარე გამოსვლებს შორის პარალელი გაავლეს და აშშ-ის მაგალითზე საქართველოსთვის “იწინასწარმეტყველეს” “საშიში მომავალი”, რომელშიც უმცირესობები უმრავლესობაზე ბატონობენ.
აღსანიშნავია 21 ივლისს სოფელ ყარაჯალაში ჩასული TV Pirveli -ს ჟურნალისტისა და ოპერატორისთვის ადგილობრივების მიერ მუშაობაში ხელის შეშლის ფაქტის “ალტ ინფოისეული” გაშუქებაც - “აზერბაიჯანელები მედიას უტევენ”.

მარნეულის რადიოს დამფუძნებელი კამილა მამედოვა ეთნიკური უმცირესობებით დასახლებულ რეგიონებში მედია გარემოსა და გამოწვევებზე საუბრობს. ჟურნალისტი ყვება, თუ რამდენად იცავს ადგილობრივი მედია სტანდარტებს მიმდინარე მოვლენების გაშუქებისას.

სექტემბერ-ნოემბერში სომხეთ-აზერბაიჯანის მასშტაბური ომის დაწყების პარალელურად ქსენოფობიური, არმენოფობიური და თურქოფობიური განცხადებების რაოდენობამაც საგრძნობლად იმატა. ქვემოთ მოცემულ დიაგრამაზე ქართული წყაროებიდან ამგვარი განცხადებების რაოდენობა შემცირებულია, თუმცა საერთო სურათს რუსული, სომხური და აზერბაიჯანული წყაროები ცვლიან. ომის მიმდინარეობისას გამოქვეყნდა არაერთი პროვოკაციული და დეზინფორმაციული ნიუსი, რომელიც უშუალოდ საქართველოსთან იყო დაკავშირებული და ასევე ქმნიდა ეთნიკური შუღლის გაღვივების საფრთხეებს. 

3 ოქტომბერს საქართველოში მოქმედმა სომხურმა გვერდმა Hayartun-მა გამოქვეყნა პოსტი, რომელიც ამხელდა რამდენიმე დღით ადრე Tik-Tok-ზე გამოქვეყნებულ ვიდეოს - აზერბაიჯანელი გოგონა (სახელად Ayla Idrisova), რომელიც თავს სომეხად ასაღებდა, ქართველებს უწმაწური სიტყვებით მოიხსენიებდა, ძაღლებს ადარებდა და აზერბაიჯანის მხარდაჭერაში სდებდა ბრალს.
ეს ვიდეო Tik-Tok-ზე ვირუსულად გავრცელდა, ხოლო მისი მხილების შემდეგ როგორც Tik-Tok-იდან, ასევე Facebook-ის ყველა გვერდიდან წაიშალა. ამჟამად ის არცერთ პლატფორმაზე არ არის ხელმისაწვდომი. Hayartun-ის გვერდს მტკიცებულებების სახით კომენტარებში რამდენიმე სქრინი ჰქონდა წარმოდგენილი. სამწუხაროდ, ამ პოსტის წაშლის შემდეგ მათი აღდგენა ვერ ხერხდება, თუმცა ამ სახელით მე შევძელი ამ გოგონას გვერდის მოძიება Facebook-ზე და დავრწმუნდი, რომ ის და ვიდეოში მოქმედი პირი ერთი და იგივე ადამიანია და რომ ის მართლაც ეთნიკურად აზერბაიჯანელია.

აქ განსაკუთრებულ ყურადღებას იქცევს 2 რამ: ქართველებისა და სომხების გადაკიდების მცდელობა და დეზინფორმაცია, რომ, თითქოს, საქართველო აზერბაიჯანს რაიმენაირად ეხმარება. ეს პირდაპირ კავშირშია მეორე დეზინფორმაციასთან თუ მცდარ ინფორმაციასთან, რომელიც ასევე ამავე პერიოდში ვრცელდება, ოღონდ ამჯერად საქმე გვაქვს სომხურ წყაროსთან.
გავრცელებული ნარატივის თანახმად, 2 ოქტომბერს სოციალურ ქსელში Facebook მომხმარებელმა ვაჰე პეტროსიანმა საკუთარ გვერდზე გამოაქვეყნა ვიდეო, რომელშიც ის თითქოსდა ბორჯომის რკინიგზის სადგურზე აფიქსირებს ჯავშან-ტექნიკას, რომელიც აზერბაიჯანში გასაგზავნადაა განკუთვნილი. ვიდეოში ის სომხურად საუბრობს და ამბობს - “,ვგონებ, ესენი [ქართველები] აზერბაიჯანში გასაგზავნად ამზადებენ ამ ტექნიკას”. ხაზგასასმელია ის, რომ ეს ადამიანი უბრალოდ გამოთქვამს ვარაუდს და არაფერს ამტკიცებს, თუმცა სოციალურ ქსელში ეს ვარაუდი მტკიცებითი ფორმით ქართველებისადმი საკმაოდ აგრესიული რიტორიკით აიტაცეს მომხმარებლებმა. გადაუმოწმებელ ინფორმაციას ასევე როგორც სომხური ( Bavnews, Armtime11), ისე რუსული (Реалист) ონლაინ გამოცემებიც ავრცელებდნენ. აღსანიშნავია, რომ Facebook-ზე ვაჰე პეტროსიანის გვერდი არამიგნებადია. შესაბამისად, ძნელია ითქვას - ვინაა ამ მცდარი ინფორმაციის თუ დეზინფორმაციის რეალური პირველწყარო.